Ajornartuulernermi nunninneq! Ukiut 60 sinnerlugit qaangiupput timmisartumi aquttut annaanneqarmata, massakkut timmisartut annaanneqarniarlerput.

1942-mi aasarisseruttoraa Hitlerip sakkutuui sumiiffiinni sorsuffiusuni tamani ajugaasaqattaarnertik ingerlatiinnartussaarpasippaat. Londoni sorsunnermi atortussaaleqingaarluni pingaartumik timmisartunik USA-mut ikioqqupput. Kisianni Amerikarmiut timmisartuinut sorsuutinut Atlantikukkut ingerlaarfissaq isorartoqaaq naviarnarlunilu, pingaartumik tyskit umiarsuaataat aqqartartut peqqutaallutik. Timmisartut sorsuutit amerlanersaat Amerikami immikkoortiterneqartariaqartarput taavalu sapaatip akunneri arlallit umiarsuarmik angalareernerup kingorna Tuluit Nunaanni ikkussorneqaqqittariaqartarlutik. Tamanna piffissaajaataaqalunilu akissaajaataaqaaq.
Timmisartut angisuut qaartartullit imarpik ikaarlugu timmisartorsinnaapput. Timmisartunulli sorsuutinut ingiaqataasunut "timmisartunut pallittaalisanut" pingaaruteqarluinnartunut imarpissuaq isorartuallaarpoq.
Piffissaq sivikitsoq sioqqullugu Lockheed-P38 „Lightning" sananeqarsimavoq. Timmisartoq sorsuut sukkanerpaaq, anginerpaaq taavalu ukiuni taakkunani timmisartunik assingusunut sanilliussilluni ungasinnerpaamukarsinnaasoq. Amerikarmiut sakkutuuisa naalagaasa ilimagaat timmisartut fabrikkimit USA-miittumit Tuluit Nunaannukarsinnaassasut - milluni orsersorfiusinnaasuni unittarluni.
Julip 7-ni 1942-mi "Operationen Bolero" aallartinneqarpoq. Timmisartut qaartartullit marluk B-17-nit "Flying Fortressit" taavalu "Lockheed-Lightning" arfinillit Amerikap naalagaaffianiit Maine-imiit aallarput. Newfoundland, Kalaallit Nunaat Islandilu qulaallugit Tuluit Nunaannukarput. Tassa sorsugiartussarpassuarni siullersaat.
Sila timmisartornissamut pitsaanerpaajunngikkaluartoq Danmarksstrædep tungaanut timmisartut ingerlalluarput. Kalaallit Nunaat Islandillu akornanni sila sukkasuumik ajortikkiartorpoq. Radiokkullu nalunaarasuaatikkut nalunaarutigineqarpoq Islandip mittarfeqarfia pujoq peqqutaaluni matoqqasoq. Timmisartumi aquttut allamik periaffissaqarnatik utertariaqarsimapput. Kingusinnerusukkut paasineqarpoq radiokkut nalunaarasuaat ilumoorsimanngitsoq taavalu ilimagineqartoq tyskit aqqartartuanniit nalunaarut nassiunneqarsimassasoq.

Taamani suli sekstanti, kronometeri (nalunaaqutaq) taavalu pujorsiut atorlugit aquttarput. Kisianni taamak avannarpasitsigisumi pujorsiut tatigisassaanngilaq. Timmisartut aqqutissaminnit qimagukkiartorput taavalu ikummatissaarukkiartorlutik. Kalaallit Nunaanni sermersuarmi nunninnissaq periarfissatuaalerpoq.
Timmisartut tamarmik Avannaarsuani qeqertap kangiani narsaamanermut mipput. Timmisartoq ataasiinnaq ajoquserpoq, sakkutuunillu ajoqusertoqarnani. Ullualuit qaangiummata angutit US-Navy-p umiarsuaaraanit annaanneqarput. Timmisartut tamarmik ataaseq minillugu suli tassaniiipput. Apummit issusuumit qallerneqaqqallutik.